Son nato 'nel altro secolo, e go vissú per molti ani in quela stupenda cita`che xè Trieste. La tra i sui coli che dolcemente i scendi en mar, coi colori caldi de l'autuno, quando el somaco colora el carso de gialo e de roso.Nel epoca che Baco fa festa e che i contadini i lavora e i festegia el racolto de la uva.Quando el mar se riempi de domila mati che i fa un sfidin con la barca a vela.Tra i refoli de la Bora e una magnada de pedoci.In quela tera de confin che nissun sa dove che xè, ma che a l'inizio del' altro secolo tuti i la voleva e i fazeva pupoli per decider a chi partenesi.La dove el bel mar azuro te rinfresca d'estade e dove le mule(e le vece) le va al bagno con le tete de fora.Dove i pasa artisti de tuti i tempi, e dove tuti i se inamora de quela meravigliosa cita, ma dove pochi i se ferma. Mi vegno de questa tera de pasagio, e xé la che guardando el mar e domandandome cosa ghe fosi dopo tuta quela acua go deciso de partir. Ma no per 'ndarmene, solo per curiositá, per veder cosa xé drio el canton. E piú volte che vado via de quel logo tanto prezioso, piú me sembra bel e unico quando ghe torno. Con le sue strade, i sui cofi, le sue osterie, la sua lingua, el suo mar, i sui campi e le sue osmize(e deso basta se no no finiso piú). Xé lá che son cresudo e me son formado,la scola,la universitá,la piscina,le babe,le bale,el lavor...Xé lá che go conosú i miei amici quei che no i me mola mai e che dove che vado li porto sempre nel cuor.Xé lá che mi asieme al mio caro amico Gonzo, de ritorno de un festival a Barcelona, go iniziado a far el selezionator de dischi, o come che i dixi i inglesi el "selecter".Xé sempre lá che go iniziado a dipinger e piturar vestidi, tacar diezemila tacomachi su un giubotin e scapotar un pocheto. E xé sempre lá che torneró quando gavró finido quel che stago fazendo de una parte o l'altra del mondo.Ma no sté pensar che rivo far tuto questo da solo.Semo in due che partimo, viagemo e 'ndemo de qua e de lá. Mi e el mio amico peloso Scott. Semo noi che portemo e spergemo el seme de la folia nel mondo, o meio de la normalitá.Si perché a noi ne sembra piú fole lavorar come un schiavo 10 ore al giorno, fazendo qualcosa che no te piaxi, senza gaver el tempo de viver. Senza poder scampar del schema che te ga caturado, e diventando niente piú che un toco de sta grande catena de montagio che xé diventado el mondo. Nisun che ridi, che fa festa e se diverti....perché? o no se pol o no xé tempo.Certo lavorar bisogna, se no cosa te magni? ma rovinarse per do lire quando de sora i te magni tute le tue fadighe no me sembra gnanca giusto.E cussí go verto stó sito, stá pagina stá roba, ciamela come che volé. Per dar un poco de spazio a mi e a tuti quei che oltre a lavorar ga qualche interese che peró noi riva a sviluparlo perché la "societá" no ghe lo permeti.Insoma xé per darghe un poca de visibilitá a tuti quei che poso darghela.El tano loco y Scott